25 Xaneiro

Novo "Contacontos de Familias" este Venres!

Non o esquezades!  Este venres, 31 de Xaneiro, espéravos
una nova, didáctica e divertida sesión do "Contacontos de Familias", co elefante multicolor Elmer, de David McKee!

Lembrade:

Obra: "Elmer"

Autor: David McKee

Hora: 16h

Lugar: Biblioteca de Leolo

Esperámosvos!

 24 Xaneiro

A PAZ na LECTURA

Desde que no 539 a.C., o rei Ciro o Grande de Persia deixase por escrito no cilindro que leva o seu nome, a primeira alusión aos dereitos das persoas, moitos foron os reis e gobernos que sentiron a necesidade, ou se viron obrigados, a escribir outros tantos documentos reflectindo os dereitos e en consecuencia , obrigacións, que todos deberiamos ter. E, con todo, aínda hoxe non foron suficientes para evitar a necesidade de clamar pola paz en todo o planeta. Moitos seguimos alzando a voz en todos os recunchos, pero non é ferramenta efectiva porque outros tantos seguen desatendéndoa polo seu interese. Iso non debe desesperanzarnos. Educar na non violencia, o entendemento, o diálogo e a tolerancia, é a mellor "arma"

para "loitar" por transformar o mundo nun lugar mellor, un mundo de Paz! Por iso, en 1964, a paz lévase á escola na forma do "Día Escolar da Non Violencia e

a Paz", conmemorando a morte de Mahatma Gandhi, (30 de xaneiro de 1948).

A literatura, axúdanos a abrir ese camiño de paz no corazón dos máis pequenos.

Faio, a través de historias que nos levan a reflexionar (como o "Diario de un campo de barro", de Ricardo Gómez Gil; "A bibliotecaria de Basora", historia real de Iraq de Jeanette Winter...), ou ben achegándonos á vida de persoas que viviron e superaron situacións de desigualdade, prohibicións ou conflitos bélicos (Malala, MadreTeresa de Calcuta...).

No expositor da Biblioteca atoparedes múltiples títulos de ambos os tipos de lecturas. Tamén atoparedes obras para lembrar que a Paz está nas nosas mans no noso día a día, pois a Paz non é ausencia de guerra ou de violencia senón un estado de convivencia en harmonía que se logra facendo que coas nosas palabras, xestos e obras se sentan a gusto as persoas que nos rodean.

Feliz xornada da Paz, e non esquezades transmitila alá onde vaiades!

 24 Xaneiro

"La nariz de oro", en "Cóntoche un conto"

Lola de 5ºA, lembrounos a importancia de ser diferente, de non sentirse mal por iso e non xulgar ou cualificar aos que nos rodean polas súas características, xa que, o importante nas nosas relacións cos demais, é: valorar as calidades que cada un ten, potencialas e sumalas par lograr un grupo, un equipo máis forte, unha personalidade máis definida.

Fíxoo contándonos o conto "Una nariz de Oro" de Raquel Saiz. Unha divertida historia que se queredes ler ou reler atoparédela na vosa Biblioteca. Moitas grazas Lola por lembrarnos esta tenra historia. Esperamos volver escoitarche moi pronto.

 23 Xaneiro

Ángela e Sela cóntaronnos: "Achís!"

Unha divertida historia de José Carlos Andrés, na que a feliz familia de 3 membros: papá, mamá e o gato, ve incrementada a súa felicidade coa chegada dun novo membro (un bebé!). Pero... Sorpresa! Esa felicidade vese embazada cando descobren que gato e bebé son mutuamente alérxicos!

Se non puideches asistir ao relato desta divertida historia, e queres saber como llas enxeñaron para resolver o problema, non dubides en tomalo prestado na Biblioteca! Divertiraste! Moitas grazas, Ángela e Sela, por este divertido relato que nos lembra que, con ilusión e reflexión todos os problemas e obstáculos poden ser superados, poñendo cada un o seu granito de area. Esperamos vervos de novo con outro divertido relato!

 22 Xaneiro

"A sopa queima!", de Pablo Albo, na sesión de "Cóntoche un conto"

Zoe, Nora e Carol de 2º B, trouxéronnos un divertido conto que, a través do gran problema de María e a súa desbordante imaxinación para superar o problema da súa sopa, a unha temperatura excesiva, podemos ver como os seres máis diminutos, en unión, poden máis que o ser máis poderoso en solitario!

A unión fai a forza!

Moitísimas grazas Zoe, Nora e Carol por achegarnos a esta divertida e instructiva historia.

Esperamos escoitarvos de novo moi pronto!

 20 Xaneiro

 "Bonitas" na sesión de "Cóntoche un conto"

Martina e Alma de 4ºA, lembráronnos o que é ser bonita e onde reside a auténtica beleza. 

Fixéronno co álbum de Stacy McAnulty cuxas ilustracións nos van mostrando como cada moza é fermosa, non por un aspecto exterior determinado, senón pola súa capacidade para identificar o seu talento, potencialo e utilizalo como aceno de identidade.

Moitas grazas Martina e Alma por proporcionarnos esta interesante reflexión.

Esperámosvos pronto!

 16 Xaneiro

Na sesión de "Cóntoche un conto"...

Martina, Noa e Martina, contáronnos a interminable procura de "Os amigos do señor Coc".

Unha obra de Jo Lodge, con moitas pestanas, baixo as que o señor Coc na súa incesante procura achará os máis diversos obxectos e algunha sorpresa! Moitas grazas, Martina. Noa e Martina por proporcionarnos este ameno momento.

Esperamos que nos fagades gozar pronto cunha nova aventura!!

 

12 Xaneiro

 "Kallaikoi, o mar das meigas" 

Co curto Kallaikoi, ("xente das montañas",como se autodenominaban os celtas no neolítico) o videógrafo submarino galego Jorge Martínez Vázquez, obtivo o terceiro premio na categoría de curto musical do Ciclo Internacional de Cinema Submarino de San Sebastián (Cimasub). Un curto sobre a riqueza mariña da Ría de Vigo.

En só 4 minutos ofrécenos unha mostra da espectacular, inmensa e, moitas veces, descoñecida vida que palpita na nosa Ría:

Non volo perdades! Podedes acceder a través desta ligazón:

https://youtu.be/BQzJNO1n03c

 Venres 10  Xaneiro

Club de Lectura de Adultos!

"El misterioso caso del impostor del Titanic", de Carmen Posadas, reuniu este venres aos membros do Club de Lectura de Adultos. Unha nova sesión moi divertida para analizar a intriga xerada por uns protagonistas, e un feito, históricos: a nosa querida Emilia Pardo Bazán e o desafortunado Titanic.

Naturalmente, ao finalizar a sesión, xa deixaron establecida a a data e a obra que volverá a unilos na seguinte cita !

Trátase de: "Últimas noticias de Sara Silva".

Unha obra de Francisco Castro na que: cobiza, engano, fama... fraguan un mundo imperfecto no que Sara só podía "desaparecer". Pero, non hai crime perfecto. A súa última obra, desaparecida, axudará a desvelar a verdade...

Animamos a todos a seguir os pasos do inspector Carlos de la Iglesia tentando de desentramar os rizos da historia e a compartir todos xuntos a experiencia na próxima sesión na que, ademais... Haberá unha sorpresa!

Francisco Castro.
Escritor e Editor de Galaxia

O seu autor: Francisco Castro en persoa, asistirá á sesión para compatir as opinións da súa obra con todos os membros do Club!

Lembrade: 

Obra: "Últimas noticias de Sara Silva"

Data:  11 de Abril

hora:  17:00 h

Lugar: Biblioteca

Evento:  Club de Lectura de Adultos coa visita do seu autor Francisco Castro!!!!

               

Ánimo! Unirvos!

Esperámosvos a todos!!!

 10 Xaneiro

"O oso e o piano" hoxe, na sesión de "Cóntoche un conto".

Mariña, Adriana e Aixa, contáronnos hoxe a historia de
David Litchfield: "O oso e o piano".

Unha marabillosa obra que nos lembra que, non importa a distancia nin o tempo que nos separe, se é verdadeira, a amizade perdurará sempre. E, ao mesmo tempo, lémbranos que, o esforzo e o tesón, pode levarnos a lograr os nosos soños por moi afastados e inalcanzables que estes semellen. Moitas grazas Mariña, Adriana e Aixa por estes didáticos e dirvertidos momentos! Parabéns polo voso éxito!

Esperamos contar convosco moi pronto con outra gran historia.

 9 Xaneiro

Club de Lectura de Adultos: Mañá Venres!

Mañá, Venres, 10 de Xaneiro, o Club de Lectura de
Adultos celebrará a súa primeira sesión tras as Festas! A tenra historia do Titanic, a frutífera escritora Emilia Pardo Bazán... Un nexo de intriga entre ambas.., Que emocións espertaría nos lectores esta aventura? Se queredes coñecelas e, achegar as vosas, para enriquecer a experiencia, non vos perdades a posta en común de mañá!

Lembrade! Esperámosvos en:

Lugar: a Biblioteca Data: Mañá Venres! Hora: 17:00 h. Obra: "O misterioso caso do impostor do Titácnic" Autora: Carmen Posadas Vémonos!!

6 Xaneiro
Xa estamos de volta e con novas sorpresas!

O equipo de Leolo Comunica investigando o contido para o seu programa

Atrás quedan os días de descanso, de reunión familiar, de desconexión das rutinas diarias e de maxia no ambiente. Volvemos de novo coas actividades! Non esquezades: a sesión de "Contacontos de Familias" cada último venres do mes, as lecturas dos recreos, o Club de Lectura, xadrez, damas... Naturalmente, Leolo traeravos novos retos sobre o noso proxecto: "Amar o Mar"...

Pero, atentos as novidades porque, con motivo das efemérides e celebracións correspondentes a este 2º trimestre, Leolo irá anunciando novas sorpresas! Chegan os concursos! Que cales son as próximas efemérides? En "Leolo comunica", o noso equipo de radio poñerache ao día! Se queres coñecer a orixe da celebración, quen lle adxudica esa data concreta, que se promove coa súa celebración ou como se celebra, segue as súas emisións aquí ou no blog de "Leolo Comunica". Na súa primeira emisión explicáronnos moi brevemente a orixe da celebración de samaín, por que celébrase o "Día Mundial do Neno" e que promove, desde cando e por que ten lugar a celebración do 25N (Día Internacional para a Eliminación da Violencia contra as Mulleres)... Podes escoitalo na seguinte ligazón:

https://go.ivoox.com/sq/2494420

Vémonos!