22 Abril

Visitounos Manuel Solla!

O alumnado de 1º e 2º de Primaria gozou dunha inesquecible sesión de contacontos con Manuel Solla.

Os efectos de maxia, as cancións, os xogos para poñer a proba a súa atención e capacidade de reacción... mentres contaba a desventura e peripecias do pobre "Conrado, el tiburón desdentado", lograron encandear ao atento público que tentaba non perderse detalle dunha peculiar sesión, pródiga en sorpresas! Aquí, deixámosvos un breve resumo no que podedes lembrar algúns dos divertidos momentos da súa actuación:

Moitas grazas Manuel Solla por esta didáctica e divertida mañá que nos soubo a pouco!

 21 Marzo

O Día Mundial da Poesía e o Mar

 O 21 de Marzo celébrase o Día Mundial da Poesía. É unha

data establecida pola UNESCO co fin de visibilizar a diversidade lingüística servíndose da expresión poética.

No noso caso, na nosa celebración, a poesía tinguiuse dunha ampla paleta de azuis, desde esmeralda ata aguamarina, azul eléctrico, zafiro, exipcio... nunha chiscadela ao noso proxecto "Amar o Mar".

Deste xeito, sobre un gran fondo mariño que mostra a creatividade de todo o alumnado, comparten escenario todo tipo de especies mariñas da nosa ría de Vigo: medusas, sepias, estrelas de mar, polbos, cangrexos... portadores de fermosas poesías mariñas.

E é que, foron moitos os poetas románticos, nostálxicos, heroicos, realistas... os que tiveron como fonte de inspiración o mar, a súa inmensidade, a súa bravura, a súa calidade de unión ou a de afastamento dos seres queridos... Aquí podedes ver o resultado:

Grazas a todos os artistas por compartir a vosa arte e colaborar xuntos  logrando un auténtico mar poético!

 22 Abril

Ángeles Escribano co noso equipo de radio "Leolo Comunica"

Que mellor modo de celebrar o Día do Libro que lendo.

Pero, o mundo da literatura é moi amplo e denso, e non sempre nos é fácil elixir ese libro que nos enganchará.

É un paso difícil pois, ás veces un título suxestivo acaba levándonos a un interior non tan interesante, e noutras ocasións ocorre todo o contrario: un título pouco revelador esconde unha aventura verdadeiramente apaixonante. Por outra banda, hai tantos libros como gustos, polo que, o que a uns engancha a outros non.

Por iso, é ideal contar con alguén que nos "guíe", que nos deixe ver que atoparemos no seu interior, aínda que sen desvelarnos a historia. Dese modo, non haberá confusión, pois elixiremos aquilo que verdadeiramente nos gusta.

Esa "guía" ofrecéunola Ángeles Escribano, quen estivo estes días connosco para facernos suxestións interesantes para todas as idades e gustos. O equipo de radio "Leolo Comunica", aproveitou a ocasión

para descubrir un misterio polo que, ao longo dos anos, todos nos preguntamos e do que, só Ángeles, coñecía a resposta: 

Todos coñecemos a Leolo, a mascota da nosa biblioteca. El proponnos actividades, nos intriga con resolución de retos, convídanos a ler... Pero, como chegou Leolo, á nosa biblioteca? Se queredes coñecer a resposta, aquí deixámosvos a ligazón ao blog da radio de "Leolo Comunica" onde atoparedes a entrevista!

https://go.ivoox.com/sq/2599612

Moitísimas grazas Ángeles por facer máis doada a selección de nosas lecturas e por descubrirnos como se xestou o nacemento da nosa querida mascota Leolo!!

 22 Abril

"Corre, corre" en "Cóntoche un conto?"

Lía e Nora, lembráronnos o importante que é non descoidar
as pequenas cousas importantes da vida e que, a présa cotiá, e o estrés con que vivimos, impídennos gozar.

Fixérono co álbum ilustrado "Corre, corre", de Magdalena.

Nunca dispoñemos de tempo para nada. Pero, é realmente imposible deternos uns segundos para ser conscientes das fermosas cousas que nos rodean, ou, simplemente, centrados únicamente en chegar a unha meta, esquecemos gozar todo o fermoso, construtivo ou relaxante que o traxecto nos ofrece?

Moitas grazas, Lea e Nora, por lembrarnos que a vida se compón de momentos e , só se sabemos gozalos ao máximo poderemos dicir que "hoxe vivimos"!

Esperamos volver escoitarvos moi pronto novamente!

 11 Abril

Francisco Castro, no Club de Lectura de Adultos da profesora María

Os membros do Club de Lectura de Adultos, gozaron o venres dunha sesión ideal!

Reuníronse como sempre co fin de poñer en común as opinións e os sentimentos suscitados no desenvolvemento da obra elixida pero, nesta ocasión, a obra era: "Últimas noticias de Sara Silva" e contaron coa presenza do seu autor: Francisco Castro! , especialista en xerar tramas fascinantes e cargadas de tensión.

O escritor, (editor, analista político e músico), coa súa proximidade e o seu carácter encantador, converteuna nunha sesión moi interesante e enriquecedora! Da súa man, puideron ir debullando aos poucos a obra, facendo unha análise profundo e real da trama a nivel psicolóxico a través do estudo de cada un dos seus personaxes. E, tamén, puideron descubrir os aspectos e factores que guían a evolución da obra, o por que de cada situación, os escenarios de Vigo... Ademais, Francisco Castro, compartiu cos membros do Club, algúns aspectos persoais da súa vida como escritor: a súa rutina, a súa inspiración, a súa forma de escribir, a súa constancia.... Definiuse como unha persoa moi metódica que, cando escribe, finaliza os seus libros dunha maneira moi produtiva e cun alto nivel de concentración. Demóstrao a súa prolífica traxectoria, pródiga en premios e recoñecemento, que lle consolidou como unha figura crave da literatura galega. Ademais, sendo un mestre en crear historias envolventes que che atrapan na súa espiral ata o final, na súa axenda, deixa un oco para promover a escritura creativa, dando formación a profesores e nenos sobre o tema. Agradecemos infinitamente a Francisco Castro a súa presenza e a súa importante achega como escritor e como persoa no noso "Club de Dulzura"!, como el mesmo bautizou!:

Grazas por esta experiencia didáctica, enriquecedora e inesquecible!!!

E, O Club, xa ten nova obra para a súa próxima reunión.

Trátase da obra: "Por que Asunta", de Inma López Silva.

Quen, ademais, temos a fortuna de tela como membro do noso Club, polo que contaremos indubidablemente coa súa presenza! Non volo perdades! Convidámosvos a todos a unirvos a nosa nova aventura!

Lembrade:

Obra: Por qué Asunta

Autora: Inma López Silva

Data: Venres, 30 de Maio

Hora: 17:00h

Lugar: Bilioteca de Leolo

Esperámosvos a tod@s!

 10 Abril

Contacontos e recomendacións lectoras de Ángeles Escribano para o "Día do Libro"

Estas semanas, a nosa compañeira Ángeles Escribano fixo un oco na súa
axenda para realizarnos unha visita e traernos novas e interesantes suxestións de lectura e novas sesións de contacontos, apoiada polos seus inseparables axudantes "Igor" e "Albert", amantes ambos da lectura e especialmente dos contos.

Multitude de obras foron saíndo da súa maleta impregnando o ambiente de enigmas, diversidade cultural, misterio, amor pola natureza, poesía... Un complexo mundo no que cada asistente puido atopar un novo título co que alimentar a súa paixón.

De modo interactivo e cos seus complementos especiais fixo un percorrido polas lecturas máis chamativas para os distintos ciclos.

Comezou cun Kamishibai moi especial, para lembrarnos os pasos previos imprescindibles a seguir para poder gozar dunha boa lectura. Seguiu cunha choiva de ideas sobre as razóns importantes para ler que tiñan os asistentes. E finalizou cunhas propostas literarias que engancharon a maiores e pequenos.

Puxo a proba a imaxinación dos maiores e captou a súa atención:

- plantexándolles algunhas das propostas da colección Enigmas: "Desafía tu mente con 25 historias de misterio", "Enigmas del mundo", "Enigmas del cuerpo humano", "Enigmas de Ciencia", "Enigmas de Arte", "Enigmas de miedo", "Enigmas de historia", de Víctor Escandell,

-con travesías inesquecibles desde a Antigüedad ata os nosos días e viaxes por algúns dos pobos máis asombrosos da terra, contemplados nas obras: "Rutas" e "Tribus" de Sam G.C. y Raquel Martín,

- e con literatura para coidar o planeta: "Música en las ramas" (Premio Ala Delta 2021) , "Los mapas del Agua" (Premio Anaya 2024), ambos de Ricardo Gómez, o "La calle de las doce lunas" del creador de "Los futbolísimos ", Roberto Santiago y escrito por VV.AA.

-lecturas animadas, como "37 tortugas" , de Pedro Albo

-e, naturalmente, con poesía de Juan Carlos Martín Ramos: "Versos para contar estrellas" o "Las palabras que se lleva el viento".

Aos lectores de segundo ciclo, entusiasmoulles coa colección ilustrada dos mitos clásicos grecorromanos máis coñecidos: "Los enigmas de la esfinge", "La terrorífica medusa", "El minotauro y el laberinto"..., de Ricardo Gómez

Aos lectores de primeiro ciclo, introduciunos no mundo da beleza depositada en cada recuncho do mundo coa obra "Maikai", de Cristina Expósito Escalona.

Aos máis pequeniños, animounos a ler, solicitando o seu apoio e facéndolles protagonistas coas marionetas da historia "¡Yo no he sido!", de Christian Voltz, "¿Ahora qué va a pasar?", de Nuria Díaz Reguera e "71 ovejas", de Pablo Albo.

Aquí podedes ver algúns momentos da súa visita:

Moitas grazas, Ángeles, por seguir animándonos a viaxar, aprender e emprender coa lectura!

 10 Abril

Emma e Laura trouxéronnos "Bonitas" a "Cóntoche un conto?"

Coa obra de Stacy McAnulty, "Bonitas", Emma e Laura (3º), lembráronnos hoxe, que a nosa beleza non reside no noso exterior senón nos nosos actos e nas nosas palabras: na súa nobreza, a amabilidade con que son ditas, o loable obxectivo con que son realizados...

Son eses aspectos os que nos fan únicos e diferentes aos demais. Non o noso estilismo ou a nosa maquillaxe. Moitas grazas, Emma e Laura por estes interesantes momentos. Esperamos volver tervos moi pronto contándonos novas historias.

 4  Abril

Celia e Antía contáronnos "De que cor é un bico"

Na súa sesión de "Contoche un conto?", léronnos esta
divertida historia de Rocío Bonilla na que a súa protagonista, Minimoni, tenta averiguar de que cor ten que pintar un bico. Bueno, mais ben, tenta facer que nós o averiguemos, pois ela non o ten moi claro ata que lle pide axuda a súa nai.

Si queres saber de que cor son os bicos da súa mamá, non dubides en leer este divertido conto que tes a túa disposición na Biblioteca.

Moitas gracias Antía e Celia pola vosa constante colaboración. Esperamos xa, con ilusión, a vosa próxima sesión.

 3 Abril

Francisco Castro, no Club de Lectura de Adultos

Chegou a data esperada!

Este próximo venres, 11 de abril, terá lugar a sesión do "Club de Lectura de Adultos", dirixido pola profesora María, e que terá como invitado especial a  Francisco Castro, o autor da obra elixida para esta data:  "Últimas noticias de Sara Silva".  

Así pois: 

Estades tod@s invitad@s a esta especial sesión, na que poderedes coñecer e compartir as vosas opinións co mesmo autor!

Obra: "Últimas noticias de Sara Silva"

Autor: Francisco Castro

Data: este próximo Venres, 11 de Abril

Hora: 17:00 h

Lugar: Biblioteca de Leolo

Esperámosvos!

 

 31 Marzo

Climarest: Ante a desolación presente, un raio de esperanza para o futuro do Bogavante da Ría de Vigo

O proxecto europeo Climarest pretende recuperar o
bogavante da ría de Vigo.

O cambio climático e, sobre todo a sobrepesca, ameazan con facerlle desaparecer das nosas augas. Como xa lle ocorreu á langosta, reclamo de turistas e científicos e desaparecida das augas das illas Cíes na década dos 80.

Según o videógrafo José Irisarri, a desaparición desta especie simbólica da nosa ría, debía servir de alerta sobre a enorme fraxilidade da biodiversidade ante a sobrepesca. E en consecuencia, debería actuarse para que o erro non se repita.

Podedes ver un artigo completo en La Voz de Galicia do 31 de Marzo de 2025. 

Aquí podedes ver o vídeo de José Irisarri sobre o bogavante, os seus costumes e a súas peculiares necesidades.

O mesmo videógrafo, José Irisarre, ilustrou co seu cámara o desastre do arrecife de "El Borrón", das Illas Cíes.

O que, fai uns anos, era un denso bosque de anémonas, refuxio de múltiples especies e mecanismo fundamental para manter o equilibrio do ecosistema, é hoxe un roquedal espido no que as especies que o habitaban desapareceron.

O mesmo José Irisarre documéntao no seguinte vídeo:

https://youtu.be/A0YThmyffqM

E, no seguinte vídeo, de novo con José Irisarre,  podedes botar unha ollada ao pasado paradisíaco que eran as illas Cíes, e o espectacular habitante que lle servía de reclamo: a extinta langosta da ría de Vigo.

https://youtu.be/Iw38NjegwZk

Proxecto Climarest: Ante a desolación do presente, un raio de esperanza para o futuro!